लहानमा कक्षा १२ की छात्रा मृत फेला, हत्या वा आत्महत्या भन्ने विषयमा शंका

शियाराम यादव,असोज -६

सिरहा जिल्लाको बरियारपट्टी गाउँपालिका–३ नर्गी बस्ने र हाल लहानस्थित एलएमसी कलेजमा कक्षा १२ मा अध्ययनरत प्रीति यादव लहान नगरपालिका–८ मा डेरा लिएर बस्दै आएकी कोठामा मृत अवस्थामा फेला परेकी छिन्। बिहानै डेरामा शंका लागेपछि कोठा ढोका खोलेर हेर्दा उनी मृत भेटिएको बताइएको छ।

घटना बाहिरिएसँगै प्रहरी टोली घटनास्थलमा पुगेको थियो। प्रारम्भिक रूपमा शवलाई मुचुल्का उठाई आवश्यक प्रक्रिया पूरा गर्दै पोस्टमार्टमका लागि पठाउने तयारी भइरहेको प्रहरीले जनाएको छ। हालसम्म प्रष्ट कारण नखुलेको र यो घटना हत्या हो कि आत्महत्या भन्नेबारे स्पष्ट हुन अझै बाँकी रहेको छ।

यस घटनाले स्थानीय क्षेत्रमा ठूलो चर्चा र त्रास सिर्जना गरेको छ। एकातिर परिवार शोकमा डुबेको छ भने अर्कोतर्फ स्थानीयले निष्पक्ष र छिटो छानबिन गर्न माग गरेका छन्। विद्यार्थी साथीहरू पनि स्तब्ध बनेका छन्।

प्रहरीले भने घटनाबारे गम्भीरतापूर्वक अनुसन्धान भइरहेको जनाउँदै आवश्यक विवरण र प्रमाण संकलन भइसकेपछि मात्र सत्य तथ्य सार्वजनिक गर्ने जनाएको छ। घटनाको पूर्ण विवरण आउन बाँकी छ।