जसपाको खोल ओढेर कांग्रेसको संरक्षणमा लागेका लहान -२४ का वडा अध्यक्ष रासलाल राय

लहान — लहान नगरपालिका–२४ का वडा अध्यक्ष रासलाल राय राजपूतमाथि आफ्नै पार्टी जनता समाजवादी पार्टी (जसपा) नेपाललाई पाखा लगाएर विपक्षी कांग्रेस पार्टीको संरक्षणमा लागेको आरोप चुलिंदो छ। जसपाका नेताहरूको आरोपअनुसार अध्यक्ष रायले पार्टीभित्रै असहिष्णुता, गुटबन्दी र कांग्रेसको लाइन समर्थन गर्ने प्रवृत्ति देखाएका छन्।

 बिगत लामो समयदेखि कांग्रेसको राजनीतिमा सक्रिय रहेका राय २०७९ सालको स्थानीय चुनावमा कांग्रेसले टिकट नदिएपछि जसपा प्रवेश गरेका थिए। जसपाबाट उम्मेदवार बनेर जित हासिल गरे पनि अहिले आएर उनले आफ्नै पार्टीका कार्यकर्तामाथि दमन गर्दै कांग्रेस निकट नेता कार्यकर्ताको संरक्षण गरिरहेको भनिएको छ। जसपा लहान २४ का नेताहरूले रायमाथि आफ्नो प्रभाव प्रयोग गरेर पार्टीभित्र डर र भ्रमको वातावरण सिर्जना गरेको आरोप समेत लगाएका छन्।

 रायमाथि आफ्नै पार्टीका नेता तथा कार्यकर्तालाई कुटपिट गराउने र योजनामा सहभागी नगराउने, बजेटको योजनामा आसेपासे, दलाल र भराैटेहरूलाई प्राथमिकता दिने तथा कमिसन उठाउने गम्भीर आरोप लागिरहेका छन्। उनले बजेटको योजनामा पनि पारदर्शिता कायम नगरेर व्यक्तिगत स्वार्थअनुसार काम गरिरहेका छन्।

 अध्यक्ष रायले मेयर महेश चौधरीसँग मिलेर चाइना रेल्वे कम्पनीमार्फत खोलामा मापदण्ड विपरीत तीन मिटरसम्म गहिरो उत्खनन गराएको पनि सार्वजनिक भएको छ। खोलाको स्रोत सुक्दा अहिले सिचाइ र खानेपानीको अभावले स्थानीय जनता समस्यामा परेका छन्। यस्तो गैरकानुनी काममा अध्यक्ष रायको संलग्नता कमिसनकै कारण भएको स्थानीयहरूको दाबी छ।

 विगतमा कांग्रेस लहान नगर सभापतिको भूमिका निर्वाह गरेका रायलाई कांग्रेसमै पनि गुटबन्दीको कारण विवादित मानिन्थ्यो। अहिले जसपामा आएर उनले त्यही पुरानै शैली दोहोर्याएको आरोप लागिरहेको छ। पार्टीका नेताहरूले भनेका छन्– जसपामा रायजस्ता व्यक्तिहरूको व्यवहारले संगठन नै कमजोर हुँदै गएको छ।

 वडामा सञ्चालन हुने योजना समितिहरूमा कांग्रेस निकट एक युवा कार्यकर्ता लाई पटक–पटक अध्यक्ष बनाइ योजनाको निगरानी जिम्मा दिइएको र त्यसै माध्यामबाट कमिसन असुल गर्ने कार्य भइरहेको छ। जसपाका युवा नेताहरूले यो शैलीलाई पार्टी नै बेच्ने प्रवृत्तिसँग तुलना गरेका छन्।

 उता, रायले आफ्नै पार्टीका उप–प्रमुख रामचलितर महतोविरुद्ध अदालतमा बयान दिएको विषयले थप आलोचना निम्त्याएको छ। जसपा भित्रकै नेताहरूको अनुसार मेयर महेश चौधरीसँग मिलेर १६ औँ नगरसभामा उप–प्रमुख अनुपस्थित हुँदा नीति तथा कार्यक्रम प्रस्तुति गर्नु र अदालतमा उप–प्रमुखको विपक्षमा बयान दिनु रायको दोहोरो चरित्रको प्रमाण हो।

वडा अध्यक्ष रायकाे तीन बर्ष कार्यकाल बितिसक्दा पनि वडामा नियमित नबस्ने, तीन बर्षमा तीन महिना पनि नियमित नबसेकाे र वडा कार्यालयमा कार्यबाहक (काबा, निमित्त )ले नै वडा कार्यालय संचालन गरीरहेेकाे स्थानीयहरु बताउछन।

 स्थानीय बासिन्दाहरूले पनि नेता रायप्रति आक्रोश व्यक्त गर्दै जुन जाेगि आए पनि कान चिरेको भन्ने लोकोक्तिलाई स्मरण गरेका छन्। पार्टीभित्रको नीति, सिद्धान्त र एकता विपरित कार्य गर्दै आएका रायप्रति जनस्तरमै असन्तोष चुलिँदै गएको छ।

 यद्यपि, केही नेताहरूले अध्यक्ष रायले केही विकासे काम पनि गरेका छन् भन्ने टिप्पणी गरे पनि बहुसंख्यक कार्यकर्ता भने उनको सत्तामोह, असहिष्णु र अवसरवादी चरित्रले जसपामा विकृति फैलिएको ठानिरहेका छन्। जसपाले अब रायजस्ता विवादित नेताको गतिविधिमाथि छानबिन गर्ने हो कि नगर्ने भन्ने प्रश्न पनि उठ्न थालेको छ।