मन्त्री बब्लु गुप्तामाथि भइरहेको मिडिया ट्रायलप्रति एनआरएनए अमेरिकाको आपत्ति

शियाराम यादव

लहान । पछिल्लो केही दिनदेखि युवा तथा खेलकुद मन्त्री बब्लु गुप्तामाथि भइरहेको मिडिया ट्रायल योजनावद्ध र पूर्वाग्रहपूर्ण भएको भन्दै गैरआवासीय नेपाली संघ (NRNA) राष्ट्रिय समन्वय परिषद् अमेरिका ले आपत्ति जनाएको छ। संघले मन्त्री गुप्ताको अमेरिका भ्रमणबारे फैलाइएका भ्रामक टीका–टिप्पणीप्रति गम्भीर ध्यानाकर्षण भएको जनाएको हो।

NRNA ले जारी गरेको विज्ञप्तिमा मन्त्री गुप्ता नेपाल सरकारका सदस्य मात्र नभई विदेशमा रहेका नेपाली युवाहरूको साझा प्रतिनिधि भएको उल्लेख गर्दै, उक्त भ्रमण औपचारिक निमन्त्रणामा आधारित रहेको स्पष्ट पारेको छ। भ्रमण तथा कार्यक्रममा लाग्ने सम्पूर्ण खर्च आयोजक संस्थाले नै व्यहोर्ने र नेपाल सरकारलाई कुनै आर्थिक भार नपर्ने पनि विज्ञप्तिमा उल्लेख छ।

यसैबीच, मन्त्री गुप्ताले अमेरिका जाने वा फर्किएर राजीनामा दिने कुनै अभिव्यक्ति नदिएको अवस्थामा पनि भ्रामक समाचार फैलाइएको भन्दै आलोचना भइरहेको छ। राजनीतिक विश्लेषकहरूका अनुसार नयाँ सोच र इमानदार राजनीतिप्रति असहज बनेका केही समूहले फेक न्युजमार्फत बदनाम गर्ने प्रयास गरिरहेका छन्।