नवनिर्मित कृषि तथा पशुपन्छी सेवा केन्द्र भवनको बोदे बर्साईनमा उद्घाटन तथा हस्तान्तरण

उमेश कुमार साह बोदे बर्साईन : सप्तरीको बोदे बर्साईन नगरपालिकामा आधुनिक सुबिधा सहित कृषि तथा पशुपन्छी सेवा केन्द्र भवन बुधबार एक कार्यक्रमबीच उद्घाटन तथा हस्तान्तरण गरिएको छ। नेपाल सरकारको कृषि तथा पशुपन्छी विकास मन्त्रालय अन्तर्गत ग्रामीण उद्यम तथा आर्थिक विकास आयोजना (आरईईडी परियोजना) आर्थिक करिडोर कार्यालय बर्दिवास, महोत्तरी मार्फत सो भवन निर्माण भएको हो। पालिकास्तरको कृषि तथा पशुपन्छी सेवा केन्द्र भवनको उद्घाटन नगरपालिकाका नगर प्रमुख आतेश कुमार सिंहले गरेका हुन्। सो भवनलाई आर्थिक करिडोर कार्यालय बर्दिवास महोत्तरीका कार्यालय प्रमुख राजेश साहले प्रमुख अतिथि एवम् नगरपालिकाका प्रमुख सिंहलाई हस्तान्तरण गरेका थिए।उक्त नवनिर्मित भवन २ करोड ७५ लाख ८७ हजार ३६ रुपैयाँ २१ पैसाको लागतमा बनेको हरिनारायण साहले जानकारी दिएका छन्। कार्यक्रम राजेश साहको अध्यक्षतामा सम्पन्न कार्यक्रममा नगरपालिकाकी उप-प्रमुख रेणु कुमारी साह , वडा अध्यक्षहरू राज कुमार यादव , शिव नारायण यादव , किरण साह , रबिन्द्र कुमार साह , बैजनाथ चौधरी , सुनित कुमार यादव , मो मोजिबुर रहमान , स्थानीय कर्मचारी, समाजसेवी तथा स्थानीयवासी लगायतहरूको उपस्थिति रहेको थियो। बोदे बर्साईन नगरपालिकाका पशु शाखा प्रमुख गिरिन्द्र यादवले पहिले साँघुरो र चुहिने भवनमा बस्दा सेवा दिन असहज हुने गरेको तर अब सुविधा सम्पन्न भवन पाएपछि किसानलाई सहज हुने बताए । उनले माटो परीक्षण, बीउ उपचार, बाली उपचार लगायतका सेवा यही भवनबाटै उपलब्ध हुने बताए । यसैबीच, बोदे बर्साईन नगरपालिका - ६ का वडा अध्यक्ष राजकुमार यादवले, नयाँ भवन बनेपछि किसानले सेवा लिन अन्यत्र धाउनुपर्ने बाध्यता हटेको बताए । उनले भने, पहिले परीक्षणका लागि बाहिर जानुपर्थ्यो, समय र पैसा दुवै खर्चिनुपर्थ्यो । अब नगरपालिकामा सुविधा पाइने भएपछि हामीलाई र स्थानीय कृषक्लाई ठूलो राहत भएको छ।