कतारमा होमबहादुरले बने बारिस्ता एरोप्रेस प्रतिस्पर्धामा प्रथम

रामएकवाल राम

दोहा -  कफी समाज नेपालले कतारमा आयोजना गरेको बारिस्ता एरोप्रेस प्रतिस्पर्धामा होमबहादुर बुढाथोकी  प्रथम बनेको छ।

शुक्रबार राति सम्पन्न प्रतिस्पर्धामा ओमान, बहराइन, इन्डोनेसिया, फिलिपिन्स, इरान र केन्या सहित देशका १०८ भन्दा धेरै कफी बनाउनेहरू सहभागी थिए। प्रतिस्पर्धामा होमबहादुर बुढाथोकी पहिलो भए। लगातार चार पटकसम्म भएको यो प्रतिस्पर्धामा नेपालीले जितेको पहिलो पटक हो।

१०८ मध्ये १६ जना मात्र नेपाली थिए तर पहिलो, दोस्रो र तेस्रो सबै नेपाली भएको कफी समाज नेपालका प्रमुख गोपाल बस्यालले जानकारी दिए। प्रतियोगितामा यासिका गुरुङ दोस्रो र दावा शेर्पा तेस्रो भएका छन।ओमान, बहराइन, इन्डोनेसिया, फिलिपिन्स, इरान र केन्यासहित देशका १० व्यक्ति निर्णायक मण्डलमा थिए भने नेपालको तर्फबाट सागर राउत थिए।

प्रथम बन्न सफल भएका होमबहादुर दक्षिण कोरियामा हुने विश्वस्तरको प्रतिस्पर्धामा भाग लिन पाउनेछन्। प्रथम हुने होमबहादुर डिसेम्बर ४ देखि ६ मा हुने अन्तर्राष्ट्रिय एरोप्रेस प्रतिस्पर्धामा भाग लिन कोरिया जानेछन।

प्रतिस्पर्धामा कतार सहित अन्य ८० देशका विजेताहरूले विश्वविजेताको लागि भिड्ने कफी समाज नेपालका प्रमुख गोपाल बस्यालले जानकारी दिए।एरोप्रेस कफी बनाउने एउटा प्रक्रिया भएको भन्दै उत्कृष्ट स्वाद निकाल्न सक्ने व्यक्ति विजेता हुने, कफी समाज नेपालका लक्ष्मीप्रसाद तिमल्सिनाले बताए।