सद्भाव युवा समाज कतारको आयोजनामा तिज कार्यक्रम सप्पन्न
दोहा, कतार : सद्भाव युवा समाज कतारले नेपाली नारीहरुको महान पर्व हतितालिका तिजको अवसरमा दर खुवाउने कार्यक्रम सम्पन्न गरेको छ ।
शनिबार साँझ नेपाली महिला समाज कतारकी अध्यक्ष माया केसीको प्रमुख आतिथ्यता तथा समाजका अध्यक्ष विजय गुरुङको सभाध्यक्षतामा कार्यक्रम सम्पन्न भएको हो ।
कार्यक्रममा नेपालबाट आमन्त्रित लोक तथा दोहोरी गायिकाद्वय टिका पुन र रेजिना परियारले सांगीतिक प्रस्तुति दिएका थिए ।
परियारले 'भुल परे दाइ म त'सहित केही आफ्ना चर्चित गीत गाइन् भने पुनले माइतीको देशलगायतका तिजका गीतहरू गएकी थिइन् । संगीतमय माहोलमा दर खुवाउँदै सम्पन्न कार्यक्रममा कतारमा रहेका केही कलाकारले सांगीतिक प्रस्तुति दिएका थिए । तिज विशेष भएका कारण कार्यक्रममा सरिक सबै संघसंस्थाका महिला प्रतिनिधि, पत्रकार, प्रमुख अतिथिसहित सांगीतिक प्रस्तुति दिने सबै कलाकारहरूलाई दोसल्ला ओढाएर कदर पत्रद्वारा सम्मान गरिएको थियो।
कार्यक्रममा आफ्नो शुभकामना मन्तव्य राख्दै प्रमुख अतिथि केसीले सद्भावले वास्तवमै आफ्ना सत्कर्ममा विशेष इँटा थपेको बताउँदै दर खुवाएर चेलीहरूलाई आफ्नो पन दर्साउनु भएकोमा खुसी व्यक्त गरिन् ।
समाजका सचिव नवीन अर्याल र महासचिव चित्रबहादुर गुरुङले मिलेर सहजीकरण गरेको कार्यक्रमको समापन गर्दै सभाध्यक्ष गुरुङले तिज नारी सशक्तीकरणको बिन्दु रहेको बताए । उनले सद्भाव समाजमा चेलीबेटी नभए पनि कतारमा रहेका चेलीबेटीको माइती बन्न सकिन्छ भन्ने उद्देश्यले कार्यक्रम आयोजना गरिएको बताए । कार्यक्रममा रुष्तम तामाङले स्वागत मन्तव्य राखेका थिए ।
अहिलेसम्म कुनै प्रतिक्रिया छैन। पहिलो प्रतिक्रिया दिनुहोस्।
तपाईंको प्रतिक्रिया लेख्नुहोस्