सिराहाको धनगढीमाईमा एक शिशु फेला स्थानीयको सक्रियतामा उद्धार

विनोद मण्डल,

सिराहा जेठ १८ । सिराहा जिल्लाको धनगढीमाई नगरपालिका–९ स्थित आरके मेडीसिटी अस्पतालको केही पश्चिममा रहेको थमनी थानको उत्तरी भित्तामा करिब १० दिनअघि जन्मिएको अनुमान गरिएको एक नवजात बालिका शिशुलाई आमाबुबाले छोडेर फरार भएका छन् । स्थानीय समय अनुसार दिउँसो करिब ४ बजेतिर, केही बालबालिकाले शिशुलाई रुँदै गरेको अवस्थामा देखेपछि उनीहरूले तत्कालै स्थानीय बासिन्दालाई खबर गरेका थिए । घटनाको जानकारी पाउनेबित्तिकै वडा अध्यक्षको समन्वयमा इलाका प्रहरी कार्यालय धनगढीबाट प्रहरी टोली खटिएको थियो । प्रहरी टोली र स्थानीयको सहयोगमा शिशुलाई तत्काल उद्धार गरी नैंनपुर अस्पतालमा स्वास्थ्य परीक्षण गरियो । अस्पताल स्रोतका अनुसार शिशु करिब १० दिनको जस्तो देखिएको छ । स्वास्थ्य परीक्षण पश्चात शिशुलाई सुरक्षित रूपमा स्थानीय पराउ रामको जिम्मा लगाइएको छ । उद्धारको समयमा शिशुको शरीरमा सुत्केरी अवस्थाका नयाँ लुगा लगाइएका थिए भने रुँदाको कारणले शरीरभरि कमिला लागेको स्थानीयहरूले बताएका छन् । वडा अध्यक्षका अनुसार शिशु पूर्णतः सकुशल छ र हाल अस्थायी रूपमा संरक्षणमा राखिएको छ । शिशुका आमाबुबाको पहिचान र खोजी कार्यको लागि प्रहरी प्रशासनले अनुसन्धान अगाडि बढाएको जनाएको छ ।स्थानीयबासीले मानवता देखाउँदै समयमै शिशुको उद्धार गरेकामा सबैले प्रशंसा गरेका छन् ।