शिक्षक नियुक्ति प्रक्रिया पारदर्शी र कानुनी: जनता नमुना प्राविधिक धार माध्यमिक विद्यालय

रासिन्द्र यादव,

सिरहा - सिरहाको नवराजपुर गाउँपालिका ४ सोनवर्षामा रहेको श्री जनता नमुना प्राविधिक धार माध्यमिक विद्यालयले हालै सम्पन्न शिक्षक नियुक्ति प्रक्रिया पूर्ण रूपमा कानुनी, पारदर्शी र निष्पक्ष रहेको स्पष्ट पारेको छ। विद्यालयमा विगतदेखि शिक्षक अभावका कारण शैक्षिक गुणस्तरमा समस्या देखिँदै आएको र करिब ११०० विद्यार्थीको भविष्य सुनिश्चित गर्न नियुक्ति अत्यावश्यक रहेको विद्यालय प्रशासनले जनाएको छ।

विद्यालयमा १६ शिक्षक दरबन्दी रिक्तमध्ये केही मरुवा र स्थायी नियुक्तिबाट भरिएको भए पनि प्राविधिक धार अन्तर्गतको सिभिल इन्जिनियरिङ कार्यक्रम सञ्चालनमा समस्या आउन थालेपछि १२ शिक्षक पदका लागि प्रक्रिया अघि बढाइएको थियो। शिक्षा विकास तथा समन्वय इकाइको निर्देशनमा कार्यालय प्रतिनिधि र विज्ञहरूको सहभागितामा लिखित परीक्षा, अन्तरवार्ता र मूल्याङ्कनसहितको नियुक्ति प्रक्रिया अपनाइएको हो।

विद्यालयका प्रधानाध्यापक मुरारी शर्माका अनुसार सम्पूर्ण प्रक्रिया वैधानिक समितिको निगरानीमा निष्पक्षरूपमा सम्पन्न भएको हो र हाल नियुक्त शिक्षकहरू विद्यालयमा कार्यरत भई पठनपाठनमा सक्रिय छन्।

यद्यपि, केही दिनयता सामाजिक सञ्जालमा नियुक्तिलाई लिएर गलत र निराधार आरोपहरू लागिरहेको भन्दै विद्यालय प्रशासनले त्यसप्रति आपत्ति जनाएको छ। प्रधानाध्यापक शर्माले सामाजिक सञ्जालको दुरुपयोग नगर्न र शिक्षा सुधारका लागि विद्यालयको प्रयासलाई साथ दिन सबै अभिभावक र शुभेच्छुकहरूलाई आग्रह गरेका छन्।

उनले सत्य उजागर हुने विश्वास व्यक्त गर्दै विद्यालय समर्पित रूपमा विद्यार्थीको भविष्य निर्माणमा लागेको बताए।