शालोम सेकेन्ड्री स्कूलका प्रिन्सिपल दिलिप पडित पर्सा प्रहरीको नियन्त्रणमा

वीरगंज - वीरगंज महानगरपालिका वडा नं. १६ गहवा रेल्वेरोडमा अवस्थित शालोम सेकेन्ड्री स्कूल +२ का प्रिन्सिपल तथा शेयरदार दिलिप कुमार पडितलाई पर्सा प्रहरीले बुधबार पक्राउ गरेको छ ।

बहुदरमाई नगरपालिका वडा नं. ३ टोल नगरदाहा निवासी पडितले शालोम सेकेन्ड्रीमा लगानी गरेका शेयरदार टेकचन्द्र साहलाई भुक्तानी गर्नुपर्ने सात लाख रुपैयाको चेक २०८१÷१२÷३१ गतेको मितिमा दिएका थिए । मञ्जुश्री फाईनान्स लिमिटेड वीरगंजको नामले रहेको सो चेक पटक–पटक बैंकमा जाँदा चेक अनुसारको मौज्दात नरहेको हुनाले सो चेक बाउन्स भएको थियो ।

पिडित टेकचन्द्र साहको जाहेरीको आधारमा पर्सा प्रहरीले पडितलाई पक्राउ गरी बैंकिङ्ग कसुर मुद्दामा सम्मानित जिल्ला अदालत पर्साबाट म्याद थप गराई अनुसन्धान कार्य अगाडि बढाएको प्रहरीले जनाएको छ।प्रारुप एजुकेशन फाउन्डेसन प्रा.लि. घण्टाघर पानगल्ली वीरगंजका सञ्चालक समेत रहेका पडितले हरिखेतान बहुमुखी क्याम्पस वीरगंज लगायतका अन्य क्याम्पसहरुमा अध्यापन गराउदै आएका छन् ।

शिक्षण जस्तो पवित्र पेशामा लागेका पडितले आफ्नै शेयरदार साहलाई करिब चार महिना देखि पिडा दिदै आईरहेको हुनाले बाध्य भएर न्यायको लागि प्रहरीलाई गुहारेको समाचारमा जनाईएको छ ।