सिरहा- सिरहाको गोलबजार नगरपालिका-४ स्थित इसराफिल राइनकी श्रीमती नगिरा खातुनले सञ्चालन गरेको हाइवे होटलमा लागूऔषध कारोबार भइरहेको भन्ने गोप्य सूचना पाएपछि इलाका प्रहरी कार्यालय गोलबजारबाट खटिएको टोलीले फागुन २७ गते साँझ ४:३० बजे छापा मारेको छ।
प्रहरी टोलीले होटल खानतलासी गर्दा होटलको बेसिनमा पहेँलो प्लास्टिकको झोलाभित्र १७ वटा कालो प्लास्टिकका पोका भेट्टाएको छ। ती पोकाहरू खोलेर हेर्दा खैरो हिरोइनजस्तो देखिने लागूऔषध फेला परेको छ। उक्त लागूऔषधको कुल तौल १.७३० ग्राम रहेकोमा शुद्ध तौल ६७० मिलिग्राम मात्र रहेको पुष्टि भएको छ।
यस्तै, सोही होटल बाहिर शंका लागी जाँच गर्दा गोलबजार नगरपालिका-७, चोहर्वाका १८ वर्षीय राजन जयसवालको साथबाट दुई वटा कालो प्लास्टिकका पोका फेला परेको छ। ती पोकामा रहेको लागूऔषधको तौल १५० मिलिग्राम रहेकामा शुद्ध तौल ४० मिलिग्राम मात्र रहेको प्रहरीले जनाएको छ।
प्रहरीले होटल सञ्चालक नगिरा खातुन र राजन जयसवाललाई लागूऔषधसहित नियन्त्रणमा लिई फागुन २८ गते सिरहा जिल्ला अदालतबाट पाँच दिनको म्याद थप गरी अनुसन्धान अघि बढाएको छ। प्रहरीले लागूऔषध कारोबारमा संलग्न अन्य व्यक्तिहरूको खोजी कार्य समेत जारी राखेको जनाएको छ।
