करेन्ट लागेर सिराहामा एक जनाको मृत्यु

विनोद मण्डल

सिराहा, चैत्र २ - नेपाल विद्युत प्राधिकरणको लापरवाहीका कारण सिराहा जिल्लाको धनगढीमाई नगरपालिका-१३, ढुंगाना टोलमा करेन्ट लागेर २७ वर्षीय हेम खडकाको मृत्यु भएको छ । खड्काको घर अगाडिबाट गएको ११ हजार भोल्टेजको तार अचानक चुँडिएर करेन्ट प्रवाहित हुँदा उनको घटनास्थलमै ज्यान गएको हो ।

स्थानीयका अनुसार पूर्व-पश्चिम राजमार्गको जिरोमाईल चौकबाट करिब तीन किलोमिटर उत्तरतर्फ रहेको खड्काको घर अगाडि तार चुँडिएको थियो । उक्त घटनामा परेका खड्का चिच्याउँदै लडे पनि तत्काल उद्दार हुन सकेन । नेपाल विद्युत प्राधिकरण  लाहानले लामो समयसम्म लाइन नकटाएका कारण उनलाई बचाउन सकिएन ।

घटनास्थलमा सूचना प्राप्त भएको करिब १८ मिनेटपछि इलाका प्रहरी कार्यालय विष्णुपुरकट्टीका प्रहरी पुगे पनि लाहानबाट थप प्रहरी टोली पुग्न दुई घण्टा लागेको थियो । प्रहरी पुगेपछि चार घण्टाको अनुसन्धानपछि मात्र नेपाल विद्युत प्राधिकरण लाहान शाखाका प्रतिनिधि घटनास्थलमा आएका थिए । राति २:१८ बजे मात्र शवलाई पोस्टमार्टमका लागि लाहान अस्पताल लगिएको पारिवारिक स्रोतले जानकारी दिएको छ ।

मृतक हेम खड्का ट्यांकर चालक थिए । केही वर्षअघि श्रीमतीसँग सम्बन्धविच्छेद भएपछि उनी पाँच वर्षीय छोरीको अभिभावक बनेर जीवनयापन गरिरहेका थिए । उनको असामयिक निधनपछि छोरी अनाथ बनेकी छिन ।

नेपाल विद्युत प्राधिकरण लाहान शाखाले ११ हजार भोल्टेज प्रसारण लाइनमा कमसल तार प्रयोग गरेको स्थानीयको आरोप छ । यसअघि पनि पटक-पटक तार चुँडिएर साना दुर्घटना भएका थिए, तर प्राधिकरणले त्यसलाई बेवास्ता गरेको गुनासो छ ।

स्थानीय बासिन्दाले ठेक्का प्रक्रियामा व्यापक अनियमितता भएको र हतारमा तार तान्दा यस्ता दुर्घटना दोहोरिएको आरोप लगाएका छन् । उनीहरूले विद्युत प्राधिकरणलाई तत्काल प्रभावकारी उपाय अपनाउन माग गरेका छन्, ताकि यस्ता घटनाले फेरि कसैको ज्यान नलियोस् ।