च्याम्पियन्स ट्रफीको उपाधि भारतले जित्यो
काठमाडौं । आईसीसी च्याम्पियन्स ट्रफीको उपाधि भारतले जितेको छ । फाइनल खेलमा न्युजिल्यान्डलाई ४ विकेटले पराजित गर्दै भारतले च्याम्पियन्स ट्रफीको उपाधि जितेको हो । न्युजिल्यान्डले दिएको २५२ रनको लक्ष्य भारतले ४९ ओभरमा ६ विकेट गुमाएर पूरा गर्यो।
भारतका लागि कप्तान रोहित शर्माले कप्तानी इनिङ्स खेले । उनले ८३ बलमा ७६ रन बनाए । श्रेयर अयरले ४८, अक्षर पटेलले २९, सुमन गिलले ३१, हार्दिक पान्ड्याले १८ रनको योगदान दिए । केएल राहुल ३४ र रविन्द्र जडेजा ९ रनमा अविजित रहे ।
बलिङमा न्युजिल्यान्डका कप्तान मिचेल सेन्टनर र माइकल ब्रेसवेलले २-२ विकेट लिए । रचिन रविन्द्र र काइल जेमिसनले एकएक विकेट झारे ।
त्यसअघि दुबई इन्टरनेसनल क्रिकेट रंगशालामा टस जितेर पहिला ब्याटिङ गरेको न्युजिल्याण्डले निर्धारित ५० ओभरमा ७ विकेट गुमाउँदै २५१ रन बनाएको थियो। न्युजिल्याण्डका लागि डेरिल मिचेलले सर्वाधिक ६३ रन बनाए ।
१०१ बल खेलेको उनले ३ चौका प्रहार गरेका थिए । रचिन रविन्द्र ३७ र ग्लेन फिलिप्स ३४ रनमा आउट हुँदा माइकल ब्रेसवेल ५३ रनमा अविजित रहे । बलिङमा भारतका कुलदिप यादव र वरुण चक्रवर्थीले दुईदुई, रविन्द्र जडेजा र महोम्मद शमीले एकएक विकेट लिएका थिए ।
अहिलेसम्म कुनै प्रतिक्रिया छैन। पहिलो प्रतिक्रिया दिनुहोस्।
तपाईंको प्रतिक्रिया लेख्नुहोस्