सशस्त्र प्रहरीका एसपी धिमाल, घुमुवा रामराज मार्फत रकम असुली गराउदै

रंजित चौरसिया

वीरगंज १४ फाल्गुन। सशस्त्र प्रहरी बल नेपाल १३ नम्बर गण पर्साका प्रमुख सशस्त्र प्रहरी उपरीक्षक राधेश्याम धिमालले संगठनकै नीति निर्देशनलाई ठाडो चुनौती दिदै घुमुवा परिचालन गरेको पाईएको छ । सशस्त्र प्रहरी बल नेपाल संगठनले घुमुवाहरुलाई परिचालन नगर्न ठाडो निर्देशन दिएपनि सशस्त्र प्रहरी उपरीक्षक धिमालले संगठनकै नीति निर्देशनलाई धज्जि उडाउदै अघोषित रुपमा घुमुवा परिचालन गरी आर्थिक लाभ लिईरहेको समाचार स्रोतले जनाएको छ ।

खास गरी सीमा सुरक्षाको जिम्मेवारी पाएका सशस्त्र प्रहरी बल नेपाल पर्साले आर्थिक लाभ लिनकै लागि सशस्त्र प्रहरी जवान रामराज यादवलाई अघोषित रुपमा घुमुवा तोकी नाका–नाकाबाट अवैध कारोबारीहरु सँग महिनवारी असुली गरि गराई रहेको बताईन्छ । 

सशस्त्र प्रहरी उपरीक्षक राधेश्याम धिमालले सशस्त्र प्रहरी जवान रामराज यादव र पानालालको संयुक्त नेतृत्वमा चार जनाको घुमुवा टोली परिचालन गरेको पाइएको हो । तस्कर संगठन संग मासिक रकम उठाउनको निम्ति घुमुवा परिचालन गरेको बजारमा व्यापक चर्चाको बिषय बनेको छ । 

सशस्त्र प्रहरी उपरीक्षक राधेश्याम धिमाल माथि राजनीतिक दलका केही नेता तथा सांसदसम्मको छत्रछाया भएको भन्दै संगठनकै नीति निर्देशनलाई धज्जि उडाउदै घुमुवा परिचालन गरेको बताईन्छ । प्रहरी उपरिक्षक धिमाल पर्सामा आए पछि करिब एक महिना सिमानाकामा एकदमै कडाई गरेका थिए । 

सो पश्चात अवैध कारोबारी र तस्करहरुले पर्सामा रहेको बिओपी र गुल्मका प्रमुखहरु मार्फत एसपी धिमालले सेटिङ्ग मिलाए पछि बिगत केही महिना देखि पर्साको अधिकांश नाकाहरुबाट तस्करी फस्टाएको स्रोतको भनाई रहेको छ ।

पर्सा जिल्लाको अधिकांश नाकाहरुबाट तस्करी र अवैध कारोबारबाट उठेको रकम बिओपी र गुल्म प्रमुख वा घुमुवा मार्फत एसपीसम्म पुग्ने गरेको र बाकी नाकाहरुको लागि घुमुवा रामराज र पानालाल मार्फत रकम असुली गराई राखेको स्रोतको दाबी रहेको छ ।

हाल पर्साको श्रीसिया, ड्राईपोर्ट, अलौं, अमरपटी, प्रसौनी, पकहाँ, खेश्राहा, भिस्वा, आसवारी, भिखमपुर, सुवर्णपपुर, बिजयबस्ती, ठोरी लगायतका बिओपी र गुल्मका प्रमुख र घुमुवाहरुले मासिक करिब ४० लाख एसपी धिमाललाई बुझाउने गरेको स्रोतको दाबी रहेको छ । सो मध्ये केही बिओपी प्रमुखहरुले आफ्नो नाकाबाट राम्रो काम नभएको भनि महिनवारी कम दिन थालेकोले एसपी धिमालले आफ्नो घुमुवा राख्न बाध्य भएको एक सशस्त्र प्रहरीले नाम न छाप्ने शर्तमा यस अनलाईनलाई बताए ।

यी नाकाहरुबाट कपडा, काजु, कस्मेटिक, चल्ला, भैसी, केराउ, काजु, मरिच, कपडा, हार्डवेयर, किनारा, कुखुरा लगायतका सामग्रीहरु सशस्त्र प्रहरीको सेटिङ्गमा निर्वाध रुपमा नेपाल भित्रिरहेको छ भने नेपालबाट रक्सी, जनावरको हडी, कबाड, काठ लगायतका सामग्रीहरु भारत गईरहेको स्थानिय प्रत्यक्षदर्शीहरुको भनाई रहको छ । 

सशस्त्र प्रहरी बल नेपाल संगठनका प्रमुख आईजीपि राजु अर्यालले चोरी तस्करीका साथै हुने गरेको अवैध क्रिययाकलाप रोकथामका लागि इमान्दार प्रहरी भनाउदाहरुलाई सीमा नाकामा पठाउने गरेका छन । तर सीमामा आउने सशस्त्र प्रहरी उपरीक्षकले समेत जो जोगि आएनि कानै चिरेको भनाइबाट अछुतो नहुने गरेको काम कारवाहीबाट प्रस्ट हुन्छ । सशस्त्र प्रहरी बल नेपाल संगठनलाई जनताको बिश्वासिलो संगठनको रुपमा रुपान्तरण गर्न आईजीपि अर्याल लागेपनि केहि कर्मचारीहरुको आर्थिक मोहका कारण विश्वासिलो संगठनको रुपमा रुपान्तरण हुन नसकिएको बताइन्छ ।