उपेन्द्र यादवको प्रमुख आतिथ्यतामा सिरहामा बलिदानी दिवस मनाउने

शियाराम यादव

जसपा नेपालका राष्ट्रिय अध्यक्ष  तथा संघीय संसद एव  पूर्व उपप्रधानमन्त्री उपेन्द्र यादवको प्रमुख आतिथ्यमा सिरहामा "बलिदानी दिवस" मनाइने भएको छ। यस कार्यक्रमलाई सफल बनाउन मधेस प्रदेशका सांसद राजकुमार गुप्ता, ललिता दास, र जिसस प्रमुख दिनेश महतो सहित विभिन्न व्यक्तित्वहरूको उपस्थितिमा तयारी बैठक सम्पन्न भएको छ।

बैठकमा आमसभालाई भव्य र प्रभावकारी बनाउनका लागि आवश्यक योजना र व्यवस्थापनका विषयमा छलफल भएको थियो। सहभागी नेताहरूले बलिदानी दिवसको ऐतिहासिक महत्वलाई उजागर गर्नका लागि सबै वर्ग र समुदायलाई कार्यक्रमप्रति सक्रिय बनाउनुपर्नेमा जोड दिए।

"बलिदानी दिवस" मधेस आन्दोलनमा आफ्नो जीवनको बलिदान गर्ने सहिदहरूको सम्मानमा मनाइने विशेष अवसर हो। यसले आन्दोलनको महत्वलाई मात्र होइन, मधेसी समुदायको पहिचान र अधिकारका लागि गरिएका संघर्षलाई पनि स्मरण गराउँछ।बैठकमा कार्यक्रमलाई व्यवस्थित बनाउन विशेष तयारी गरिने निर्णय गरिएको छ।

स्थानीय जनप्रतिनिधिहरू र समुदायसँग समन्वय गरी कार्यक्रमलाई सफल बनाउन प्रचार-प्रसार, सुरक्षाका प्रबन्ध, र सहभागिताको सुनिश्चिततामा विशेष ध्यान दिने योजना बनाइएको छ।सिरहामा मनाइने बलिदानी दिवसको कार्यक्रमले मधेस आन्दोलनको योगदानलाई अझ सशक्त बनाउने विश्वास गरिएको छ। आयोजकहरूले यस अवसरमा सबैलाई सहभागिताका लागि आह्वान गरेका छन्।